‘’ यसपाली तिहारमा म घर आउंदिन
देश छताछुल्ल पोखिएको बेला
लाखौं चेली विधवाको पोसाकमा ढाकिएको बेला
म तिमीसंग हाँसो बाँड्न सक्तिन
त्यसैले दिदी यसपाली तिहारमा म घर आउँदिन
तिम्रो हातको सप्तरंगी टिका लाउँदिन
दाजु जंगलतिर, भाइ खाडी मूलुक छिरेको बेला
आमाको छाती चरचर चिरिएको बेला
म दुवो र मखमलीको माला लाउँदिन
साँच्चै, दिदी यसपाली म घर आउँदिन
तिम्रो हातको सप्तरंगी टिका लाउँदिन
विदेशमा नेपालीको हत्या भएको बेला
कति भाइहरु निर्दोष भइ कारागारको जीवन विताइरहेको बेला
म सेलरोटी र सगुन खाँदिन
हो, दिदी यसपाली म घर आउँदिन
तिम्रो हातको सप्तरंगी टिका लाउँदिन
खाडी मूलुकमा चेलीहरुको दुदर्शा भएको बेला
कति बहिनीहरुका चीर हरण भएको बेला
म तिहारको मण्डपमा बस्न सक्दिन
हो, दिदी यसपाली म घर आउँदिन
तिम्रो हातको सप्तरंगी टिका लाउँदिन
देशमा अमनचयन भत्किएको बेला
विदेशीले हाम्रो माटोमा आँखा लाएको बेला
म हाँसेर देउसीभैलो खेल्न सक्तिन
हो, दिदी यसपाली म घर आउँदिन
तिम्रो हातको सप्तरंगी टिका लाउँदिन