डाटा रिकभरी सफ्टवेयर
कहिलेकाहीं अनायासै फाइल मेटिंदा तपाईंलाई अप्ठेरो परेको छ ? वा नचाहँदा-नचाहँदै पनि भण्डारण संयन्त्र फम्र्याट गर्नुपरेकाले सबै डाटा हराएर चिन्तित बनाएको छ ?
कम्प्युटर प्रयोगकर्तामाझ यी र अन्य कारणले डाटा हराउने समस्या नौलो होइन । तुलनात्मक रूपमा केही कम-बेसी भए पनि अधिकांश कम्प्युटर प्रयोगकर्ताले यस्ता समस्याको सामना गर्नैपर्छ, तर अब भने कम्युटरबाट फाइल हराउने समस्याको निदान भैसकेको छ । बजारमा विभिन्न सफ्टवेर निर्माता कम्पनीहरूले डाटा रिकभरी सफ्टवेरको बिक्री प्रारम्भ गरिसकेका छन्, जसको मुख्य काम कम्प्युटरबाट हराएका सूचनाहरूलाई पुनःस्थापन गर्नु हो ।
कम्प्युटर प्रयोगकर्ताहरूबीच सूचना संवेदनशील विषयका रूपमा रहन्छ । त्यसो त कम्प्युटरको प्रयोग नै डाटा भण्डारण र प्रसोधन गर्नलाई हुन्छ । अत्यावश्यक होस् वा उतिसारो महत्त्व नभएका सूचना नै किन नहून्, आजभोलि कम्प्युटर प्रयोगकर्तालाई सूचना मोहले छोपेको छ । त्यसैले सामान्य घरायसी प्रयोगका लागि उच्च क्षमताका हार्डडिस्कको माग भैरहेको छ । यस्तो अवस्थामा दुःख गरेर संग्रह गरेको डाटा हरायो भने कसको चित्त नदुख्ला !
केही समयअघिसम्म यो समस्याले धेरैलाई सताएको थियो । थाहै नपाई मेटाइएका हार्डडिस्कमा संग्रहित सूचना होस् वा तपाईंको डिजिटल क्यामेराबाट अचानक हराएका विशेष व्यक्तिको तस्बिर नै किन नहोस्, यी र यसै गरी हराएका फाइलको खोजीका लागि डाटा रिकभरी सफ्टवेयर तयार छन् । तपाईं ढुक्क भए हुन्छ ।
सामान्य कम्प्युटर प्रयोगकर्तालाई कम्प्युटरबाट डिलिट गरिएका वा डिस्कहरू फम्र्याट गरिसकेपछि हराएका सूचनाहरू पुनःस्थापना कुनै चमत्कारझैं लाग्न सक्छ । हुन पनि हो, डिलेट गरिसकेका फाइलहरू जतिसुकै खोजे पनि फेला पार्न सकिँदैन, रिकभरी सफ्टवेरले भने सजिलै भेट्टाउनु कम आश्चर्य होइन । वास्तवमा कम्प्युरबाट कुनै फाइल हराउनु भनेको न त इरेजरले सिसाकलमले लेखेको मेटाएजस्तो हो, न त हाम्रो फोहोर डम्पिङ साइटमा फालेजस्तो हो । कम्प्युटरमा त्यो बेलासम्म डाटा संग्रहित रहिरहन्छ जुन बेलासम्म त्यो डाटामाथि अरू डाटा लेखिँदैन । यही अवधारणाले नै डाटा रिकभरी सम्भव बनाएको छ ।
कम्प्युटरमा डाटा रिकभरी सफ्टवेयरले कसरी काम गर्छ भन्ने थाहा पाउनुअघि डिलिट कमान्डले कसरी काम गर्छ भन्ने बुझ्दा सजिलो हुन्छ । कम्प्युटरले स्टोरेज डिभासलाई सेक्टर र ट्रयाकमा विभाजन गरेको हुन्छ । यही सेक्टरमा प्रयोगकर्ताका डाटा संग्रहित हुन्छन् । कम्प्युटर पहिलो पटक खुल्दा अपरेटिङ सिस्टमले सबै फाइलको ठेगाना जम्मा पारेर राख्छ र प्रयोगकर्ताको आवश्यकता-अनुसार फाइल खोल्दा यो ठेगानाको सहयोग लिन्छ । कुनै फाइल वा डाटा डिलिट गर्नु, अपरेटिङ सिस्टमले अन्य फाइलको ठेगानाको सूचीबाट उक्त फाइलको ठेगाना हटाउनु हो । यो अवस्थामा अपरेटिङ सिस्टमले निश्चित फाइल भेट्टाउन सक्दैन । यथार्थमा त्यहाँ डाटा यथावत् हुन्छ ।
डाटा रिकभरी सफ्टवेयरले कम्प्युटरको अपरेटिङ सिस्टमलाई बाइपास गर्छ र सीधै स्टोरेज डिभाइससम्म पुग्छ र त्यहाँ रहेका डाटालाई पुनःस्थापन गर्छ । कम्प्युटरमा मेमोरी म्यानेजमेन्ट, सेक्युरिटी म्यानेजमेन्टजस्ता कामहरू पनि अपरेटिङ सिस्टमले नै गर्छ । दुई बेग्ला-बेग्लै अपरेटिङ सिस्टम भएको कम्प्युटरमा एउटा अपरेटिङ सिस्टमको सुरक्षा प्रणालीबाट सुरक्षित तुल्याइएको फाइल अर्को अपरेटिङ सिस्टमको प्रयोग गरी प्रयोगकर्ताले सूचना सजिलै प्रयोग गर्न सकिन्छ । आजभोलि कम्प्युटरको हार्डडिस्क, मेमोरी डिस्क, विभिन्न रिमुभेवल डिस्कहरूबाट मेटाइएका वा हराएका डाटा खोज्न सकिने थरीथरीका सफ्टवेयर प्रयोगमा छन् । आफ्नो व्यक्तिगत कम्प्युटरका डाटा मात्र हैन, इमेल इनबक्सबाट मेटाइएका चिठीपत्रहरू पनि पुनःस्थापना गर्ने विभिन्न सफ्टवेयर प्रयोगमा आइसकेका छन् ।
यी सफ्टवेयरहरूमार्फत हराएका फाइल खोज्न कठिन पनि छैन । प्रयोगकर्तालाई अत्यन्त सजिलो हुने गरी विकास गरिएका यी सफ्टवेयरमा दिइएको निर्देशानुसार फाइल सर्च गर्न सकिन्छ । त्यसै गरी कतिपय डाटा रिकभरी सफ्टवेयर निःशुल्क डाउनलोड गर्न सकिन्छ भने केहीलाई निश्चित रकम तिर्नुपर्छ । तपाईं यदि डाटा हराउने समस्याबाट पीडित हुनुहुन्छ भने डाटा रिकभरी सफ्टवेयर रामवाण सावित हुन सक्छ । प्रयोग गर्न अबेर नगर्नुहोस् ।
साभारः साप्ताहिक