मानव अधिकारको प्रश्न
नेपालमा विगत एक दशकमा मानव अधिकारको अवस्था तल्लो विन्दूमा पुगेको कुराप्रति राष्ट्रिय र अन्तर्राष्ट्रिय रूपमै चिन्ता व्यक्त गरिंदैछ। मानिसको बांच्न पाउने अधिकार नै कुण्ठित हुन पुगेको छ। सुरक्षा दलले चलाएको गोली उछिट्टिएर निर्दोष महिलाको मृत्यु हुन्छ। माओवादीले छोडेर गएको बम चलाउंदा निर्दोष बालकको ज्यान जान्छ। यो द्वन्दमा दुवै पक्षले जितेको दाबी गरेपनि हार जनताकै भैराखेको छ। अन्तराष्ट्रिय समुदायमा मानव अधिकारको चरम उल्लंघन हुने राष्ट्रहरुको सूचिमा नेपालको नाम पनि जोडिन पुगेको छ। बेला बखतमा लागू हुने गरेको संकटकालले मानव अधिकारको अवस्थालाई झन् कमजोर विन्दूमा पुर्याईदिएको छ। व्यक्ति हत्या, एम्बुस र साना संगठित हमला गरेर राज्यलाई थकाउने र अस्तव्यस्त तुल्याउने रणनीति माओवादीहरुले लिएजस्तो देखिन्छ तर परिणाम- सामान्य नागरिकको जनजीवन अस्तव्यस्त भैरहेछ।