भारतको दृष्टिकोण
नेपालको माओवादी विद्रोहमा बेलाबखत भारतको नाम चर्चामा आउने गर्छ। भारतसितको ऐतिहासिक, सांस्कृतिक तथा सामाजिक सम्बन्धको कारण नेपालका घटनाहरुमा भारत नै सबभन्दा महत्वपूर्ण बाहिरी प्रभावित रहिआएको छ। दुई देशबीचको खुल्ला सिमानाले विद्रोहको नियन्त्रणमा एउटा कठिन स्थिति उत्पन्न गराई राखेको छ। माओवादी विद्रोही नेताहरुको भनाईमा अमेरिकी साम्राज्यवाद र भारतीय विस्तारवाद शान्तिपूर्ण राजनीतिक समाधानका मुख्य बाह्य अवरोध रहिआएका छन्। माओवादीहरुका ४० वटा मागहरु मध्ये पहिलो ८ वटा नेपाल - भारत सम्बन्धहरुका प्रश्नहरुसितै सम्बन्धित छन्। भारतले नेपालको संकटबाट फाईदा उठाउन खोजिरहेको आरोप समेत सुन्नमा आउने गर्दछ।